लुम्बिनी,१७ कात्तिक। सीमा सुरक्षा व्यवस्थालाई थप प्रभावकारी बनाउँदै सीमामा हुने आपराधिक गतिविधि नियन्त्रण गर्न नेपाल र भारतका सीमा सुरक्षा अधिकारीबीच छलफल भएको छ।
लुम्बिनीमा सम्पन्न सशस्त्र प्रहरी बल, नेपाल र भारतीय सशस्त्र सीमा बल (एसएसबी) बीचको दशौँ डीआईजीस्तरीय समन्वयात्मक बैठकमा सीमा सुरक्षा, अवैध चोरीनिकासी तथा पैठारी नियन्त्रण र सीमा अपराध न्यूनीकरणका विषयमा छलफल भएको हो।
Advertisement
Advertisement
Advertisement
बैठकमा सशस्त्र प्रहरी बल, नेपाल नं. ५ विन्ध्यवासिनी बाहिनी मुख्यालय रुपन्देहीका बाहिनीपति डीआईजी दीपक अधिकारी र भारतीय सशस्त्र सीमा बल, सेक्टर हेडक्वार्टर लखीमपुर खिरीका डीआईजी बी. विक्रमनले आ-आफ्नो टोलीको नेतृत्व गरेका थिए।
बैठकमा मानव बेचबिखन, नक्कली मुद्रा कारोबार, लागूऔषध ओसारपसार, तेस्रो मुलुकका नागरिकको गैरकानुनी प्रवेश नियन्त्रण तथा सीमा स्तम्भको मर्मतसम्भारलगायतका विषयमा छलफल भएको थियो। साथै, दशगजा क्षेत्रमा संयुक्त गस्ती सञ्चालन गर्ने, सूचना आदानप्रदानलाई प्रभावकारी बनाउने तथा खेलकुद र अन्य संयुक्त गतिविधिलाई निरन्तरता दिने विषयमा दुवै पक्षबीच सहमति भएको डीआईजी दीपक अधिकारीले जानकारी दिए।
बैठकमा गत वैशाख २२ गते भारतको रुपैडिहास्थित एकीकृत जाँच चौकीमा सम्पन्न नवौँ समन्वयात्मक बैठकका निर्णय तथा एजेन्डाको समेत समीक्षा गरिएको थियो।
डीआईजी अधिकारीले यस्ता नियमित बैठकले दुवै देशबीच सहमत भएका विषयको कार्यान्वयनमा सहयोग पुग्नुका साथै सीमा सुरक्षा व्यवस्थालाई थप व्यवस्थित र प्रभावकारी बनाउन महत्वपूर्ण भूमिका खेल्ने बताए। उनले सहमतिमा भएका विषय कार्यान्वयनका लागि दुवै पक्षको सक्रिय सहभागिता आवश्यक रहेकोमा जोड दिए।
बैठकमा भारतीय पक्षका डीआईजी बी. विक्रमनले डिजिटल बोर्डरको अवधारणा तथा बाहिनीस्तरमा सूचना आदानप्रदानका लागि अनौपचारिक संयन्त्र विकास गर्नुपर्ने धारणा राखेका थिए।
बैठकमा नेपालका तर्फबाट एसएसपी तेजप्रसाद पोखरेलसहित लुम्बिनी प्रदेशका सीमावर्ती जिल्लामा कार्यरत सशस्त्र प्रहरी गणपतिहरुको सहभागिता थियो। त्यस्तै, भारतीय पक्षबाट गोरखपुर र लखीमपुर खिरी सेक्टरअन्तर्गतका पाँच–पाँचवटा बटालियनका कमाण्डरहरु सहभागी भएका थिए।
