भैरहवा, १८ माघ। भैरहवामा जारी रुपन्देही सुपरलिग क्रिकेट प्रतियोगितामा तिलोत्तमा क्रिकेट एकेडेमीले जित हात पारेको छ। प्रतियोगिता अन्तर्गत ‘ए’ डिभिजन शुक्रबार भएको खेलमा न्यु होराइजन किक्रेट क्लबलाई १ सय ११ रनको फराकिलो अन्तरले पराजित गर्दै तिलोत्तमाले जित हात पारेको हो ।
सिद्धार्थ क्रिकेट मैदानमा टस जितेर ब्याटिङ गरेको तिलोत्तमाले निर्धारित ५० ओभरमा ४० ओभर ३ बल खेल्दै सबै विकेट गुमाएर १ सय ७८ रन बनायो । उसका लागि सन्दीप यादवले ५५ रनको महत्वपूर्ण अर्धशतकीय पारी खेले ।
Advertisement
Advertisement
Advertisement
यस्तै, कृष्ण भुसालले २२, मनिष थापाले १७, कृष्ण कार्कीले १५ र अमन बोहराले १० रन बनाए । बलिङमा न्यु होराइजनका प्रिन्स पालले ३, महेश भरले २ तथा सहिन खान, विप्रसन केसी, सिद्धार्थ ढकाल र प्रदीप साहनीले समान १–१ विकेट लिए ।
जवाफी ब्याटिङ गरेको न्यु होराइजन २३ ओभर ५ बलमा सबै विकेट गुमाएर ६७ रनमै समेटियो र फराकिलो अन्तरले लज्जास्पद हार व्यहोर्यो । उसलाई सस्तैमा रोक्न तिलोत्तमाका कृष्ण कार्कीले ८ ओभर ५ बलमा ३ मेर्डनसहित १४ रन खर्चेर ६ विकेट लिए ।
यस्तै, विपिन खत्री, आशुतोष पाण्डे र सागर भण्डारीले समान १–१ विकेट लिए । विप्रसन केसीले ३० र प्रदीप साहनीले १० रन बनाए पनि न्यु होराइजनका अन्य ब्याटरले दोहोरो अंकमा रन बटुल्न सकेनन् । कृष्ण कार्की प्लेयर अफ द म्याच भइ एक हजार दुई सय रुपैयाँ प्राप्त गरे ।
रुपन्देही क्रिकेट संघको आयोजना र सिद्धार्थनगर नगरपालिकाको सहप्रायोजनामा जारी प्रतियोगिताको विजेता टिमले नगद १ लाख १ रुपैयाँ र उपविजेताले ५० हजार १ रुपैयाँ नगदसहित ट्रफी, मेडल र प्रमाणपत्र प्राप्त गर्नेछन् । यस्तै, हरेक खेलको म्यान अफ द म्याचले १ हजार दुई सय, म्यान अफ द सिरिजले १५ हजार, बेष्ट ब्याटर, बेष्ट बलर र उदयीमान खेलाडीले जनही ५ हजार रुपैयाँ पाउने संघका कोषाध्यक्ष तथा खेल संयोजक निरजप्रताप खाँणले जानकारी दिए ।
