भैरहवा, १५ असार। आन्तरिक राजस्व कार्यालय भैरहवाले चालु आर्थिक वर्षको ११ महिना (साउनदेखि जेठसम्म) ११ अर्ब ४४ करोड ९८ लाख ४० हजार रुपैयाँ राजस्व संकलन गरेको छ।
गत आर्थिक वर्ष २०८०/८१ को तुलनामा यो वर्षको ११ महिनामा उक्त रकम २३ प्रतिशतले बढी अर्थात २ अर्ब १४ करोड ३० लाख ८५ हजार रुपैयाँ बढी संकलन भएको आन्तरिक राजस्व कार्यालय भैरहवाका प्रमुख कर अधिकृत प्रेमराज पोख्रेलले बताए।
Advertisement
Advertisement
Advertisement
आर्थिक गतिविधिमा वृद्धि, नियमित, प्रभावकारी र क्षेत्रगत बजार अनुगमन, अर्थतन्त्रका सूचकहरुमा देखिएको सुधार, बक्यौता असुलीमा तीव्रता, कर परीक्षण तथा अनुसन्धानको प्रभावकारीता, परिणाममुखी करदाता शिक्षा, नक्कली मूल्य अभिवृद्धि कर बिजक जारी गर्नेहरुमाथिको अनुसन्धान जस्ता कारणले राजस्व संलन गत वर्षको तुलनामा वृद्धि भएको प्रमुख कर अधिकृत पोख्रेलले जानकारी दिए।
उनका अनुसार कार्यालयले चालु आर्थिक वर्षमा वार्षिक लक्ष्यको ८६.१ प्रतिशत राजस्व संकलन गरिसके छ । असार महिनामा लक्ष्य अनुसार राजस्व संकलनमा सफलता प्राप्त हुने कार्यालयको अपेक्षा छ ।
कार्यालयले चालु आर्थिक वर्ष २०८१/०८२ को ११ महिनामा आयकरतर्फ १ अर्ब ३४ करोड ८४ लाख ३२ हजार, अन्तःशुल्कमा ८ अर्ब ११ करोड २२ लाख ८७ हजार, मूल्य अभिवृद्धि कर (भ्याट) तर्फ १ अर्ब करोड ८२ करोड ५ लाख ३ हजार, ब्याज करमा ७ करोड ८१ लाख ८० हजार, बहाल आयकरमा ५ करोड ३ लाख ७ हजार, स्वास्थ्य सेवा करमा ३ करोड ५२ लाख ४० हजार, शिक्षा सेवा शुल्कवापत १८ हजार तथा अन्य शिर्षक करमा ४८ लाख ७३ हजार रुपैयाँ राजस्व संकलन गरेको जनाएको छ ।
आन्तरिक राजस्व कार्यालय भैरहवाले प्रत्येक महिना शतप्रतिशत राजस्व संकलन गर्न नसकेता पनि चालु आर्थिक वर्षको ११ महिनामध्ये भदौ, असोज, फागुन, वैशाख र जेठमा राजस्व विभागद्वारा तोकिए अनुसारको राजस्व संकलन गरेको छ। अन्य महिनामा पनि ८० प्रतिशतभन्दा माथि राजस्व संकलन भएको प्रमुख पोख्रेलले बताए।
कार्यालयले जेठ महिनामा विभागले दिएको १ अर्ब २४ करोड ४४ लाख ४२ हजार रुपैयाँ असुली लक्ष्यमा १ अर्ब ४४ करोड २३ लाख हजार रुपैयाँ संकलन गरेको छ। यो जेठ महिनाको लक्ष्यको करिब १६ प्रतिशत बढी हो ।
आन्तरिक राजस्व कार्यालय भैरहवाको कार्यक्षेत्र रुपन्देही जिल्लाको सिद्धार्थनगर नगरपालिका, तिलोत्तमा नगरपालिकाको वडा नम्बर ५ देखि १७ सम्म, देवदह नगरपालिकाको वडा नम्बर १, २, ३, ४, ११ र १२, लुम्बिनी साँस्कृतिक नगरपालिका, गैडहवा, कोटहीमाई, मर्चवारी, मायादेवी, ओमसतिया, रोहिणी, सम्मरीमाई र सियारी गाउँपालिका रहेका छन् ।
