कपिलवस्तु, १७ भदौ। लुम्बिनी प्रदेशकी पूर्वसांसद तथा पूर्वअर्थ राज्यमन्त्री सुषमा यादवले नेपाली कम्युनिस्ट पार्टी (नेकपा) को साधारण सदस्यसमेत नरहने गरी राजीनामा दिएकी छन्। उनले प्रदेश कमिटी सदस्य र मायादेवी गाउँपालिका इन्चार्जसहित पार्टीमा आफूले सम्हाल्दै आएका सबै जिम्मेवारीबाट अलग भएको जानकारी दिएकी हुन्।
राजीनामा पत्रमार्फत यादवले आफू २०७४ सालदेखि पार्टीमा सक्रिय रहँदै नीति, विचार, सिद्धान्त र संगठन निर्माणका क्षेत्रमा निरन्तर योगदान दिएको उल्लेख गरेकी छन्। तर पछिल्लो समय पार्टीभित्र देखिएको राजनीतिक अवस्था, निर्णय गर्ने शैली, संगठन सञ्चालनको तरिका तथा कार्यकर्ताप्रतिको व्यवहारप्रति असन्तुष्टि बढ्दै गएपछि पार्टीबाट अलग हुने निष्कर्षमा पुगेको उनले बताएकी छन्।
Advertisement
Advertisement
Advertisement
पार्टीभित्र आफूले अपेक्षा गरेको राजनीतिक संस्कार र पारदर्शिता कमजोर बन्दै गएको यादवको भनाइ छ। सामूहिक निर्णयको अभ्यास, जिम्मेवारीप्रतिको गम्भीरता, न्यायोचित व्यवहार तथा कार्यकर्तालाई दिइने सम्मानमा समेत कमी आएको महसुस भएपछि राजीनामा दिने निर्णय गरेको उनले स्पष्ट पारेकी छन्।
आफ्ना राजनीतिक आदर्श, निष्ठा र आत्मसम्मानमा सम्झौता गरेर पदमा कायम रहनुभन्दा पार्टीबाट बाहिरिनु उचित ठानेको यादवले बताएकी छन्।
पार्टी सदस्यता त्यागे पनि जनतासँगको आफ्नो सम्बन्ध र सामाजिक दायित्व भने निरन्तर रहने उनको भनाइ छ। जनताको सुख–दुःख, अधिकार, न्याय तथा सामाजिक हितका विषयमा आगामी दिनमा पनि आफ्नो क्षमता र विवेकले भ्याएसम्म आवाज उठाइरहने यादवले प्रतिबद्धता जनाएकी छन्।
उनले ‘पद छोड्दैमा जनताप्रतिको जिम्मेवारी समाप्त हुँदैन र पार्टी छोड्दैमा जनतासँगको सम्बन्ध टुट्दैन’ भन्दै आफ्नो राजनीतिक यात्रा जनताका मुद्दासँग जोडिएर अघि बढ्ने संकेत गरेकी छन्।
