काठमाडौं,१८ कात्तिक। नेपाल राष्ट्र बैंकले तिहारको धनतेरस पर्वलाई लक्षित गर्दै बिहीबारदेखि सुन तथा चाँदीका सिक्का बिक्री गर्ने भएको छ। यस वर्ष राष्ट्र बैंकले चाँदीका सिक्का (मेडालियन)सँगै सुनका सिक्का (असर्फी) समेत बिक्रीमा ल्याउन लागेको हो।
यसअघि लगातार दुई वर्ष चाँदीका सिक्का मात्र बिक्री गर्दै आएको राष्ट्र बैंकले यसपटक सुनका असर्फी पनि उपलब्ध गराउन लागेको छ।
Advertisement
Advertisement
Advertisement
बैंकले जारी गरेको सूचना अनुसार, कात्तिक १९ र २० गते प्रति व्यक्ति २.५ ग्रामको सुनको असर्फीे एक थान तथा १० ग्रामको चाँदीका मेडालियन (लक्ष्मी र गणेश अंकित) १/१ थानका दरले (बढीमा दुई थान मात्र) विक्री गरिनेछ।
राष्ट्र बैंकले दशैँअघि नै वाणिज्य बैंकहरुबाट ३५ किलो सुन खरिद गरी असर्फी निर्माणको काम अघि बढाएको थियो। नेपालमा वाणिज्य बैंकहरुलाई मात्र सुन आयात गर्ने अनुमति रहेको छ।
राष्ट्र बैंकका अनुसार, सुनको असर्फी तथा चाँदीका मेडालियनको मूल्य दैनिक रुपमा बिहान करिब ११ बजेपछि निर्धारण गरिनेछ। मूल्य निर्धारण भएपछि मात्रै सिक्का बिक्री प्रक्रिया सुरु गरिनेछ।
राष्ट्र बैंकले बिक्री गर्ने सुनका असर्फीको शुद्धता करिब ९९.९९ प्रतिशत हुने जनाइएको छ।
