

भैरहवा,४ मंसिर। भैरहवामा नेपाली भाषा तथा साहित्यका आदिकवि भानुभक्त आचार्यको पूर्णकदको सालिक निर्माण सुरु गरिएको छ। सामूहिक विद्यालय परिवार रुपन्देहीको पहलमा सिद्धार्थ बसपार्क परिसरस्थित पार्कमा सालिक निर्माणको काम अघि बढाइएको हो।
सिद्धार्थनगर नगरपालिकाले उपलब्ध गराएको जग्गामा निर्माण हुन लागेको सालिक स्थलमा बिहीबार नगरप्रमुख इस्तियाक अहमद खानले शिलान्यास गरेका हुन्।
Advertisement

Advertisement
Advertisement
नेपाली भाषा र साहित्यको विकासमा भानुभक्तले पुर्याएको योगदानको सम्मान तथा स्मरण गर्ने उद्देश्यले सालिक निर्माण गर्न लागिएको सामूहिक विद्यालय परिवारका अध्यक्ष विष्णुप्रसाद पन्थीले जानकारी दिए।
नगरप्रमुख खानले राष्ट्रका गौरव तथा ऐतिहासिक व्यक्तित्वहरुको योगदानलाई सबैले स्मरण र सम्मान गर्नुपर्ने बताए। यस्ता व्यक्तित्वको सम्मानले नयाँ पुस्तालाई इतिहास, भाषा र साहित्यप्रति प्रेरित गर्ने उनको भनाइ छ।
भारतमा निर्माण गरिएको ६ फिट अग्लो पूर्णकदको सालिक भैरहवा ल्याइसकिएको छ। अहिले सालिक राख्ने संरचना निर्माणको काम भइरहेको र तीन साताभित्र सम्पन्न गर्ने लक्ष्य राखिएको छ।





