भैरहवा, २० चैत ।
के तपाईको आँखाको मोतिबिन्दु भएको छ ? यदि भएको छ र आर्थिक अभावका कारण शल्यक्रिया गराउन सक्नु भएको छैन भने चिन्ता नलिनुहोस् । यहाँको सिद्धार्थनगर नगरपालिकाले आर्थिक अवस्था कमजोर भएका स्थायीबासीहरुका लागि निःशुल्क शल्यक्रिया गर्ने व्यवस्थापन गरेको छ ।
जसका लागि नगरपालिकाको कार्यालय र नेपाल नेत्र ज्योति संघ, लुम्बिनी नेत्र विज्ञान अध्ययन संस्थान तथा रिसर्च सेन्टर/श्री रण अम्बिका शाह आँखा अस्पताल लुम्बिनी प्रदेशबीच सम्झौता पत्रमा दुवै पक्षको दस्तखस्त सहित पत्र आदानप्रदान भएको छ । सम्झौतापत्रमा सिद्धार्थनगर नगरपालिकाको तर्फबाट प्रमुख (मेयर) इश्तियाक अहमद खाँ र अस्पतालको तर्फबाट कार्यक्रम निर्देशक सह–प्राध्यापक डा. कविन्द्र वज्राचार्यले हस्ताक्षर गरेका छन् ।
Advertisement
Advertisement
Advertisement
आँखामा मोतिविन्दु भएर पनि आर्थिक अभावका कारण शल्यक्रिया गराउन नगरवासीलाई परेको समस्यालाई मध्यनजर गर्दै कार्यक्रम लागु गरिएको सिद्धार्थनगर नगरपालिकाका मेयर खाँले जानकारी दिए ।
आँखाको निःशुल्क शल्यक्रियाले नगरवासी लाभान्वित हुने विश्वास लिइएको उनले बताए । उक्त सेवा लिनका लागि नगरवासीले बसोवास गरेको सम्बन्धित वडा कार्यालय वा नगरपालिका कार्यालयबाट सिफारिसका आधारमा नगरमा रहेको श्री रण अम्बिका शाह आँखा अस्पतालमा निःशुल्क शल्यक्रिया गराउने सक्ने सिद्धार्थनगर नगरपालिकाका प्रमुख प्रशासकीय अधिकृत जनक थापाले बताए ।
उनका अनुसार अस्पतालमा एक दशमलव ५ प्रतिशत (एक सय रुपैयाँ) शुल्कमा नाम दर्ता गरी नगरवासीले आँखामा मोतिविन्दु लागे/नलागेको आफै जाँच गराउनुपर्ने छ । यदि जाँचमा मोतिविन्दु लागेको पहिचान भएमा त्यसपश्चात लाग्ने शुल्कमा नगरपालिकाले ८४ प्रतिशत र अस्पतालले १४ दशमलव ५ प्रतिशत व्यर्होने गरी सम्झौता भएको छ ।
