भैरहवा, २४ माघ। रुपन्देही प्रहरीले विभिन्न मुद्दामा फरार रहेका प्रतिवादीहरुलाई पक्राउ गरेको छ । रुपन्देहीको विभिन्न प्रहरी युनिटहरुले कर्तव्य ज्यान मुद्दा, कुटपिट, सार्वजनिक अपराध, भ्रष्टाचार र लागूऔषध मुद्दाका एक दर्जन फरार प्रतिबादीहरुलाई प्रहरीले पक्राउ गरेको हो ।
अदालतबाट सजाए फैसला भएपछि मुद्दाका प्रतिवादीहरु फरार थिए । प्रहरीले अभियान चलाएर फरार प्रतिवादीहरुलाई धमाधम पक्राउ गरिरहेको छ । कर्तव्य ज्यान र कुटपिटको मुद्दामा फरार रहेका रुपन्देहीको कोटहीमाई गाउँपालिका–२ का साधु तिवारी, जोगी तिवारी, फौजदार मुसलमान र रामजित लोधलाई जिल्ला प्रहरी कार्यालय, रुपन्देहीको टोलीले पक्राउ गरेको छ ।
Advertisement
Advertisement
Advertisement
त्यस्तै इलाका प्रहरी कार्यालय बुटवलले सार्वजनिक अपराध र कर्तव्य ज्यान मुद्दामा फरार रहेका बुटवल उप–महानगरपालिका–४ का साजन थापा, युवराज थापा, बुटवल उपमहानगरपालिका–१ का शिवलाल बिक, बुटवल–३ का राजेन्द्र अमात्यलाई पक्राउ गरेको छ ।
भ्रष्टाचार मुद्दामा फरार रहेका लुम्बिनी सांस्कृतिक नगरपालिका–९ का नागेन्द्रप्रसाद तिवारीलाई इलाका प्रहरी कार्यालय लुम्बिनीले पक्राउ गरेको छ । वडा प्रहरी कार्यालय बुटवलले लागूऔषध र सार्वजनिक अपराध मुद्दामा फरार रहेका बुटवल–७ का सन्तोष राना, बुटवल–७ का सन्दिप राना र तिलोत्तमा नगरपालिका–४ का सुरज गुप्तालाई पक्राउ गरेको छ ।
पक्राउ परेका प्रतिवादीहरुलाई सजाए भुक्तानका लागी जिल्ला अदालत रुपन्देहीमा पेश गरिएको जिल्ला प्रहरी कार्यालय रुपन्देही डीएसपी सुरज कार्कीले बताए ।
