अर्घाखाँची,१३ कात्तिक। लुम्बिनी प्रदेश सरकारले बेरोजगारी न्यूनीकरण गर्दै युवालाई स्वरोजगार र उद्यमशीलतामा जोड्न ब्याज अनुदान कार्यक्रम ल्याउने तयारी गरेको छ। कृषि, उत्पादन तथा साना उद्योग सञ्चालन गर्न चाहने युवालाई प्रोत्साहन गर्ने उद्देश्यले कार्यक्रमको कार्यविधि निर्माण कार्य भइरहेको प्रदेश सरकारले जनाएको छ।
मुख्यमन्त्री चेतनारायण आचार्यले शुक्रबार अर्घाखाँचीमा उद्योगी तथा व्यवसायीसँगको छलफलमा युवालाई उद्यमी बनाउने कार्यक्रम सरकारको प्राथमिकतामा रहेको बताए। उनले कृषि र उत्पादनमूलक क्षेत्रमा युवाको आकर्षण बढाउन ब्याज अनुदान उपलब्ध गराउने योजना रहेको जानकारी दिए।
Advertisement
Advertisement
Advertisement
व्यवसाय सञ्चालनमा देखिएका कानुनी तथा नीतिगत समस्या समाधान गर्न प्रदेश सरकार तयार रहेको उल्लेख गर्दै मुख्यमन्त्री आचार्यले व्यवसायीका सुझावका आधारमा आवश्यक कानुन र नीतिमा सुधार गरिने बताए।
यस्तै, यातायातसम्बन्धी सेवा जिल्लास्तरमै विस्तार गर्ने र पटके सेवासम्बन्धी व्यवस्था सहज बनाउन कार्यविधि संशोधन गर्ने विषयमा पनि सरकारले छलफल गरिरहेको उनले जानकारी दिए।
प्रदेशका १२ वटै जिल्लाका उद्योगी तथा व्यवसायीसँग छलफल गरी समस्या र सुझाव संकलन गर्ने सरकारको योजना रहेको मुख्यमन्त्री आचार्यले बताए।
