दाङ, १७ वैशाख। लुम्बिनी प्रदेश सरकारले मन्त्रालयमा सचिवहरुको जिम्मेवारी हेरफेर गरेको छ । बुधवार बसेको मन्त्रिपरिषद् बैठकले सचिवहरुको जिम्मेवारी हेरफेरसहित तीनवटा निर्णयहरु गरेको लुम्बिनी प्रदेश सरकारका प्रवक्ता तथा कृषि, भूमिव्यवस्था तथा सहकारी मन्त्री दिनेश पन्थीले जानकारी दिए ।
उनका अनुसार बैठकले प्रदेश सचिवहरुको जिम्मेवारी तोक्ने, आर्थिक वर्ष २०८२/०८३ मा स्थानीय तहमा बाँडफाँड हुने सवारीसाधन करको अनुमानित सीमा पठाउने र प्रदेशमा जीवनाशक विषादी व्यवस्थापनसम्बन्धी विधेयकको मस्यौदा तयार पार्न सैद्वान्तिक सहमति प्रदान गर्ने निर्णय गरेको हो ।
Advertisement
Advertisement
Advertisement
मुख्यमन्त्री तथा मन्त्रिपरिषद्को कार्यालयले पेश गरेको सचिवहरुको जिम्मेवारी तोक्ने प्रस्तावलाई बैठकले स्वीकृत गरेको छ । उक्त निर्णयअनुसार बसन्त प्रसाद कोइरालालाई सामाजिक विकास मन्त्रालय र प्रमोद भट्टराईलाई वन तथा वातावरण मन्त्रालयको सचिवका रुपमा जिम्मेवारी तोकिएको छ ।
त्यस्तै आर्थिक मामिला तथा योजना मन्त्रालयले पेश गरेको आर्थिक वर्ष २०८२/०८३ मा स्थानीय तहमा बाँडफाँड हुने सवारीसाधन करको अनुमानित सीमा पठाउने प्रस्ताव पनि बैठकले स्वीकृत गरेको छ ।
यस्तै कृषि, भूमिव्यवस्था तथा सहकारी मन्त्रालयलाई लुम्बिनी प्रदेशमा जीवनाशक विषादी व्यवस्थापनसम्बन्धी व्यवस्था गर्न विधेयकको मस्यौदा तयार गर्न सैद्वान्तिक स्वीकृति प्रदान गरिएको प्रदेश सरकारले जनाएको छ।
