भैरहवा,१ जेठ। लामो समयदेखि जिल्लामा हुँदै आएको हुण्डी कारोबारमाथी रुपन्देही प्रहरीले डण्डा चलाउन सुरु गरेको छ। हुण्डी कारोबारको आरोपमा प्रहरीले दुई दिनमा तीन जनालाई पक्राउ गरी उनीहरुको साथबाट २५ लाख ७५ हजार बढी रुपैयाँ बरामद गरेको छ।
गोप्य सूचनाको आधारमा प्रहरीले एक भारतीय नागरिकसहित कपिलवस्तु र रुपन्देहीका गरी ३ जनालाई रकमसहित पक्राउ गरेको जनाएको छ । पक्राउ पर्नेहरुमा रुपन्देहीको सम्मरीमाई गाउँपालिका-७ का ३८ वर्षीय दिनेश बनियाँ, कपिलवस्तुको शुद्धोधन गाउँपालिका-१ का ४६ वर्षीय मसिउद्दिन फकिर र भारतको नौतनवाका ५० वर्षीय कृष्ण अग्रहरी रहेको जिल्ला प्रहरी कार्यालय रुपन्देहीले जनाएको छ। प्रहरीले यी तीनै जनालाई छुट्टाछुट्टै रुपमा रकमसहित पक्राउ गरेको हो ।
Advertisement
Advertisement
Advertisement
प्रहरीका अनुसार बुधवार जिल्ला प्रहरी कार्यालय रुपन्देहीबाट खटिएको टोलीले भैरहवा बैंकरोडस्थित लु ६८ प ४७९ नम्बरको मोटरसाइकल रोकेर चेकजाँच गर्ने सम्मरीमाईका बनियाको साथबाट १३ लाख ५० हजार रुपैयाँ बरामद भएको हो।
त्यस्तै सिद्धार्थनगर नगरपालिका-१२ स्थित हुण्डी कारोबार भइरहेको सूचनाको आधारमा वडा प्रहरी कार्यालय भैरहवाको टोलीले कपिलवस्तुका फकिरको साथबाट तीन लाख ८६ हजार दुई सय रुपैयाँ र एक थान मोबाइल बरामद भएको जिल्ला प्रहरी कार्यालय रुपन्देहीका सूचना अधिकारी एंव डीएसपी सुरज कार्कीले जनाए ।
उनका अनुसार बिहीवार वडा प्रहरी कार्यालय भैरहवाबाट खटिएको टोलीले यूपी ५६ जे १६५३ नम्बरको मोटरसाइकल रोकर चेकजाँच गर्ने क्रममा भारतका अग्रहरीको साथबाट स्रोत नखुलेको ८ लाख ३९ हजार चार सय पचास रुपैयाँ र एक थान मोबाइल बरामद भएको छ।
पक्राउ परेका तीनै जनालाई हुण्डी सम्बन्धी कारोबार गर्न नहुने कसुरमा जिल्ला अदालत रुपन्देहीबाट ७ दिनको थप गरेर अनुसन्धान अघि बढाइएको जिल्ला प्रहरी कार्यालय रुपन्देहीले जनाएको छ ।
