काठमाडौं,५भदौ। अर्थमन्त्री डा. स्वर्णिम वाग्लेले सरकारले तत्काल नोटबन्दी गर्नेबारे कुनै योजना नबनाएको स्पष्ट पारेका छन्।
राष्ट्रिय स्वतन्त्र पार्टी (रास्वपा) ले वनस्थलीस्थित पार्टी कार्यालयमा आयोजना गरेको ‘नागरिक, नीति र नेतृत्व’ संवाद कार्यक्रममा बोल्दै उनले नोटबन्दी गर्नेबारे सरकारले अहिले केही नसोचेको बताए।
कार्यक्रममा सहभागी नागरिकहरुले ‘नोटबन्दी किन नगर्ने ?’ भन्दै प्रश्न गरेपछि अर्थमन्त्री वाग्लेले सरकारको धारणा सार्वजनिक गरेका हुन्।
‘नोटबन्दीका बारेमा यहाँहरुका रोचक प्रश्नहरु सुनेँ। तर, अहिले हामीलाई यो उपयुक्त हुन्छ जस्तो लाग्दैन। नोटबन्दीबारे हामीले सोचेका छैनौँ,’ उनले भने।
उनका अनुसार नोटबन्दीको अभ्यास गरेका अन्य मुलुकहरुमा समेत यसको परिणाम अपेक्षाअनुसार सफल देखिएको छैन। त्यसैले नेपालको वर्तमान परिस्थितिमा नोटबन्दी उपयुक्त विकल्प नरहेको सरकारको निष्कर्ष रहेको उनले संकेत गरे।