गुल्मी,२७ असोज। प्रतिकूल मौसमका कारण करिब चार महिनादेखि अवरुद्ध गुल्मीको रेसुङ्गा विमानस्थलको हवाई सेवा पुनः सञ्चालनमा आएको छ। सेवा सुरु भएसँगै मंगलबार काठमाडौंबाट १३ यात्रु बोकेर आएको विमान रेसुङ्गामा अवतरण गरेको थियो भने गुल्मीबाट दुई यात्रु लिएर काठमाडौं फर्किएको थियो।
गत जेठको तेस्रो सातादेखि अवरुद्ध भएको हवाई उडान आजदेखि संचालनमा आएको गुल्मीको रेसुङ्गा विमानस्थलका स्टेशन प्रमुख सुमन थापाले जानकारी दिए।
Advertisement
Advertisement
Advertisement
नेपाल वायुसेवा निगमले मौसम अनुकूल भएसँगै सातामा तीन दिन आइतबार, मंगलबार र शुक्रबार उडान गर्ने तालिका निर्धारण गरेको छ।
निगमको १८ सिट क्षमताको ट्वीनअटर विमानमार्फत सञ्चालन हुने उडानका लागि काठमाडौं–गुल्मी भाडा १० हजार ७१० रुपैयाँ र गुल्मी–काठमाडौं भाडा १० हजार ५१० रुपैयाँ तोकिएको छ।
लामो समय हवाई सेवा अवरुद्ध हुँदा वृद्धवृद्धा, बिरामी तथा अत्यावश्यक कामले काठमाडौं जानुपर्ने यात्रु बढी प्रभावित भएका थिए। सडकमार्गबाट काठमाडौं पुग्न १२ देखि १६ घण्टासम्म लाग्ने यस क्षेत्रका नागरिकले हवाई सेवामार्फत ४५ देखि ५० मिनेटमै यात्रा गर्न सक्नेछन्।
नेपाल वायुसेवा निगमले २०८० वैशाख २९ गतेदेखि रेसुङ्गा विमानस्थलबाट व्यावसायिक उडान सुरु गरेको थियो। पछिल्लो समय इन्धनको मूल्यवृद्धि, सडक पूर्वाधारको स्तरोन्नति र सहज सार्वजनिक यातायातका कारण विमानस्थलबाट यात्रा गर्ने यात्रुको सङ्ख्यामा भने कमी आएको बताइएको छ।
