मर्चवार,२७ असोज। राष्ट्रिय स्वतन्त्र पार्टी (रास्वपा) बाट निर्वाचित प्रतिनिधिसभा सदस्य श्रद्धा कुँवर क्षेत्रीले रुपन्देहीको मर्चवारीमाई गाउँपालिका–५ स्थित प्रसिद्ध मर्चवारीदेवी मन्दिरमा धार्मिक पर्यटनको प्रचुर सम्भावना रहेको बताएकी छन्।
मन्दिरको दर्शन गर्न पुगेकी सांसद कुँवरले मन्दिरको प्रचारप्रसार र आवश्यक पूर्वाधार विकास गर्न सके यस क्षेत्रलाई प्रमुख धार्मिक पर्यटकीय गन्तव्यका रुपमा स्थापित गर्न सकिने बताइन्।
Advertisement
Advertisement
Advertisement
‘मर्चवारीदेवी मन्दिरका बारेमा मैले पहिलेदेखि नै सुन्दै आएकी थिएँ । दर्शन गर्न धेरैपटक आउने प्रयास गरे पनि विभिन्न कारणले सम्भव भएको थिएन । यसपटक दशैंको अवसरमा दर्शन गर्न पाउँदा खुसी छु’,उनले भनिन्।
रुपन्देही क्षेत्र नं. ४ बाट निर्वाचित प्रतिनिधिसभा सदस्य कन्हैया बनियाले मर्चवारीदेवी मन्दिरलाई पर्यटनसँग जोड्न तथा राष्ट्रियस्तरमा प्रचारप्रसार गर्न विभिन्न सांसद र मन्त्रीहरुलाई मन्दिरको अवलोकन तथा दर्शनका लागि ल्याउने पहल गरिरहेको बताए।
मन्दिरलाई राष्ट्रिय सम्पदाका रुपमा सूचीकृत गर्न आवश्यक पहल भइरहेको उल्लेख गर्दै उनले प्रधानमन्त्री तथा पर्यटनमन्त्री समक्ष समेत प्रस्ताव राखिएको जानकारी दिए। उनले मन्दिरको धार्मिक तथा ऐतिहासिक महत्त्वलाई उजागर गर्दै यसको संरक्षण, विकास र पूर्वाधार निर्माणमा जोड दिनुपर्ने बताए।
