भैरहवा,१६ कात्तिक। रुपन्देहीको कोटहीमाई गाउँपालिका–७ स्थित कटफोरवा नालानजिक धान खेतमा बरामद महिलाको शवको घटनाको निष्पक्ष अनुसन्धान गरी दोषीमाथि कडा कानुनी कारबाही गर्न माग गरिएको छ।
घटनाको सत्यतथ्य सार्वजनिक गरी पीडित परिवारलाई न्याय दिलाउन माग गर्दै लुम्बिनी प्रदेशसभा सदस्य वसीउद्दीन खाँसहित कोटहीमाई गाउँपालिकाका अध्यक्ष बालकृष्ण त्रिपाठी, सम्मरीमाई गाउँपालिकाका अध्यक्ष विनोदकुमार श्रीवास्तव र मायादेवी गाउँपालिकाका अध्यक्ष ध्रुवनारायण चौधरीले रुपन्देहीका प्रमुख जिल्ला अधिकारी विश्वप्रकाश अर्याललाई संयुक्त रुपमा ज्ञापनपत्र बुझाएका छन्।
Advertisement
Advertisement
Advertisement
उनीहरुले जिल्ला प्रशासन कार्यालयमार्फत प्रधानमन्त्री तथा मन्त्रिपरिषद्को कार्यालय र गृह मन्त्रालयको समेत ध्यानाकर्षण गराएका हुन्।
गत कात्तिक १२ गते बिहीबार कोटहीमाई गाउँपालिका वडा नं. ४ र ७ को बीचमा पर्ने कटफोरवा नालाको छेउस्थित धान खेतमा कोटहीमाई गाउँपालिका–५, सानो मझगावाकी जुबैदा खातुनको शव फेला परेको थियो। घटनाको प्रकृति र संवेदनशीलतालाई मध्यनजर गर्दै जनप्रतिनिधिहरुले यसको गम्भीरतापूर्वक अनुसन्धान गर्न सरकारसँग माग गरेका छन्।
ज्ञापनपत्रमा घटनाको वास्तविक कारण पत्ता लगाई निष्पक्ष छानबिनमार्फत सत्यतथ्य सार्वजनिक गर्न, घटनामा संलग्न दोषीलाई कानुनी दायरामा ल्याउन तथा मृतकलाई न्याय दिलाउन सम्बन्धित निकायको ध्यानाकर्षण गराइएको छ।
त्यस्तै, यस्ता संवेदनशील घटना भविष्यमा दोहोरिन नदिन राज्यका सुरक्षा तथा अनुसन्धान निकायले प्रभावकारी भूमिका निर्वाह गर्नुपर्नेमा पनि जोड दिइएको छ।
