दैलेख,२२पुस । दैलेखमा पेट्रोलियम पदार्थको अन्वेषण गर्दा ग्याँस भेटिएको छ । जिल्लाको भैरवी गाउँपालिका १ स्थित जलजलेमा पेट्रोलियम पदार्थको लागि अन्वेषण गर्ने क्रममा ग्याँस भण्डार रहेको संकेत पाइएको छ ।
पेट्रोलियम पदार्थ अन्वेषणका लागि ड्रिलिङपछि परिक्षणका लागि त्यहाँबाट पेट्रोलियम पदार्थको नमुना लिइएको छ । ग्याँस भण्डारको संकेत देखिएपछि खानी तथा भूगर्भ विभागले अनुसन्धान भइरहेको जनाएको छ।
Advertisement
Advertisement
Advertisement
पेट्रोलियम पदार्थ हुनसक्ने भन्दै चीनको जिओलोजिकल सर्भे कम्पनीले भौगर्भिक अध्ययन गरेको परियोजनामा सीएनपिसी इन्जिनियरिङले उत्खनन् थालेको थियो । पेट्रोलियम पदार्थ उत्खनन् र अन्वेषणमा गर्न २ अर्ब ४० करोड रुपैयाँसँगै प्राविधिक सहयोग गर्नेगरी चिनियाँ र नेपाल सरकारबिच सम्झौता भएको थियो ।
आयोजनाका सिनियर डिभिजनल जियोलोजिस्ट सुरेश श्रेष्ठका अनुसार ४ हजार १३ मिटर गहिराइसम्म उत्खनन् गर्दा ग्याँस भण्डार हुन सक्ने संकेत देखिएको छ।
उत्खनन् पछि निकालिएको नमुना परीक्षणका लागि चीनको प्रयोगशालामा पठाइएको छ । चीनमा पठाइएको नमुना परीक्षणको परिणाम आएपछि व्यावसायिक रुपमा उत्खनन् गर्न सकिने वा नसकिने स्पष्ट हुने बताइएको छ।