हृदयराम गुप्ता
मर्चवार, ८ साउन । रुपन्देहीको कोटहीमाई गाउँपालिकाले आर्थिक वर्ष २०८२/०८३ को नीति तथा कार्यक्रममा कृषि क्षेत्रलाई प्राथमिकतामा राखेर बजेट ल्याएको छ।
चालु आर्थिक वर्षमा पालिकाको कृषि क्षेत्रलाई व्यवसायीकरण गर्न तथा कृषि उपजमा वृद्धि गर्न सिंचाई प्रवद्र्धन, कृषि सडक निर्माण, कृषियन्त्रीकरण तथा कृषि आधुनिकीकरण गरी कृषकलाई अनुदान व्यवस्थापन गरी प्रोत्साहन हुने गरी पालिकाको बजेट, नीति तथा कार्यक्रम ल्याइएको कोटहीमाई गाउँपालिका अध्यक्ष बालकृष्ण त्रिपाठीले बताए।
Advertisement
Advertisement
Advertisement
पालिकाको प्रत्येक वडामा निःशुल्क सिचाईंको लागि भइरहेको विद्युतीयकरणलाई निरन्तरता दिइने नीति तथा कार्यक्रममा समेटेको छ। कदमहवा, बैरघाट, मझगावाँ हुँदै परसहवा र कुडसर, देवनबक्सापुर, बेनीनगरबाट दुईमोहानसम्म निर्माण गरिएको कृषि सडकलाई थप स्तरीय बनाउने जनाएको छ।
कृषि क्षेत्रलाई कोटहीमाई गाउँपालिकाको आर्थिक समृद्धिको मेरुदण्ड मान्दै ‘व्यवसायिक कृषि पेशा अवलम्बन गरौं, आत्मनिर्भर बनौ’ नाराका साथ कृषि क्षेत्रलाई यान्त्रीकरण, व्यवसायीकरण र बजारीकरणका कार्यक्रम गर्ने पालिका अध्यक्ष त्रिपाठीले जानकारी दिए। उनका अनुसार पालिका क्षेत्रमा रसायनिक मललाई निरुत्साहित गर्न हरियो मल प्रवद्र्धन कार्यक्रम सञ्चालन गरिनेछ।
दूध तथा मासुजन्य उत्पादनका लागि गाई, भैसी तथा बाख्राहरुमा निःशुल्क कृत्रिम गर्भाधान कार्यक्रम गरी नश्ल सुधार तथा बालीनाली संरक्षणको लागि माटो परीक्षण र विभिन्न तरकारी, बाली, फलफूलसहितका विरुवाहरुको बीउ वितरण गर्ने कार्यक्रम सञ्चालन गरिने पालिकाले सार्वजनिक गरेको नीति तथा कार्यक्रममा उल्लेख छ।
त्यस्तै पालिकाले पर्यटन प्रवद्र्धन, भूमि व्यवस्था, श्रम, रोजगार लगायतका कार्यक्रम समेत सञ्चालन गर्नेछ। शिक्षा क्षेत्रलाई व्यवस्थित बनाई शिक्षक र विद्यार्थीहरुको अनुपात मिलाई आवश्यकता अनुसार शिक्षक भर्ना गर्ने नीति बनाइएको छ। पूर्वप्राथमिक तथा प्राथमिक तहमा शिक्षण सिकाईमा अंग्रेजी भाषालाई प्रोत्साहन गर्ने र मन्टेश्वरी तथा किण्डर गार्डेन विधिलाई अवलम्बन गरिने बताइएको छ।
पालिकाको स्थानीय कला, संस्कृति झल्काउने ‘हाम्रो कोटहीमाई’ पुस्तक पाठ्यपुस्तक निर्माण गरिने छ।
‘स्वास्थ्य क्षेत्रका समस्याहरुको अध्ययन गरी स्वास्थ्य कार्यक्रमहरुलाई प्रभावकारी बनाइनेछ र नेपाल सरकारले तोकेको औषधीहरु स्वास्थ्य चौकीमा प्रयाप्त व्यवस्थापन गर्न औषधी गरिनेछ। खोप कार्यक्रमलाई प्रभावकारी बनाउन खोप केन्द्रहरुको निर्माण गरिनेछ’, अध्यक्ष त्रिपाठीले भने।
पालिकाका अनुसार स्थानीयको उपचारको क्रममा आवश्यक परेको रगत निःशुल्क उपलब्ध गराउन नेपाल रेडक्रस सोसाइटीसँग सम्झौतालाई निरन्तरता दिइनेछ। दीर्घकालीन रोग तथा प्राण घातक रोगलाई न्यूनीकरण र नियन्त्रण गर्न विभिन्न कार्यक्रम गर्ने अध्यक्ष त्रिपाठीले बताए ।
महिला, युवा तथा युवतीहरुलाई स्वरोजगारी बनाउन विभिन्न सीपमूलक तालिमसहित प्रविधि हस्तान्तरण कार्यक्रमलाई प्रभावकारी बनाइने बताइएको छ।
गाउँपलिकाभित्रको यातायात व्यवस्थालाई सहज बनाउन सडकको चौडाई न्यूनतम ६ मिटर कायम गरिनेछ।
त्यसै गरी सूचना प्रविधि, जलश्रोत विद्युत, वन तथा वातावरण, फोहोरमैला व्यवस्थापन, विपद् व्यवस्थापन तथा जलवायु उत्थानशीलता, सुशासन तथा संस्थागत विकास, योजना र विकास व्यवस्थापन, नीति कानून र न्याय सम्बन्धी नीति निर्माण गरिएको र सो नीतिहरुलाई प्रभावकारी बनाइने नीति तथा कार्यक्रममा उल्लेख छ।
आर्थिक वर्ष २०८२÷०८३ का लागि ४७ करोड ८९ लाख ६५ हजार बराबरको बजेट ल्याइएको कोटहीमाई गाउँपालिका उपाध्यक्ष सुशिला कुमारी यादवले बताइन् ।
उनका अनुसार समानीकरण अनुदान (नेपाल सरकारबाट) ११ करोड ९२ लाख, प्रदेश सरकारबाट ८३ लाख १० हजार, राजस्व बाँडफाँड (नेपाल सरकारबाट) १० करोड १९ लाख ४७ हजार, प्रदेश सरकारबाट १ करोड ५० लाख ८ हजार, नदीजन्य पदार्थबाट ४० लाख, स्थानीय स्रोतबाट ७५ लाख, गत आ.व.को मौज्दात २ करोड ३५ लाख, सशर्त अनुदान (चालुतर्फ) १७ करोड ३२ लाख, सशर्त अनुदान (पूँजीगत तर्फ) १ करोड ५५ लाख, समपुरक अनुदान (चालूगत तर्फ) ७८ लाख, समपुरक अनुदान (पूँजीगत तर्फ ७५ लाख) रहेको छ।