भैरहवा,२८ माघ। प्याब्सन कपका लागि खेलाडी छनोटका विषयमा भइरहेको विरोधप्रति ध्यानाकर्षण भएको जनाउँदै रुपन्देही क्रिकेट संघले आफ्नो कुनै संलग्नता नरहेको स्पष्ट पारेको छ।
खेलाडी छनोटका विषयमा विभिन्न क्षेत्र र सामाजिक संजालबाट रुपन्देही क्रिकेट संघलाई जोडेर विरोध भएपछि संघले ध्यानाकर्षण पत्र जारी गर्दै खेलाडी छनोटका विषयमा कुनै समन्वय नभएको र संघको संलग्नता नरहेको स्पष्ट पारेको हो ।
Advertisement
Advertisement
Advertisement
संघका अध्यक्ष हरिबहादुर थापाले छनोट प्रक्रियामा संघसँग कुनै किसिमको समन्वय नभएको भन्दै भ्रममा नपर्न आम क्रिकेटप्रेमी, खेलाडी, समर्थक र अभिभावकहरुमा अनुरोध गरेका छन् ।
काठमाडौं जिल्ला प्याब्सनले आयोजना गर्न लागेको ‘प्याब्सन कप यु–१५ राष्ट्रिय क्रिकेट प्रतियोगिता’का लागि लुम्बिनी प्रदेशस्तरीय छनोटबारे आफूहरुलाई जानकारी नदिएको संघका अध्यक्ष थापाले बताए।
‘उक्त प्रतियोगिताको छनोट प्रक्रियामा ब्यापक अनियमितता भएको भनी रुपन्देही क्रिकेट संघको नाम जोडी गुनासाहरु आएकाले रुपन्देही क्रिकेट संघसँग प्याब्सनले कुनै सहकार्य नगरेको सबैमा जानकारी गराउँछौं’, जारी गरिएको ध्यानाकर्षण पत्रमा भनिएको छ, ‘लुम्बिनी प्रदेश प्याब्सन टीमको छनोट प्रक्रिया प्याब्सनले स्टार क्रिकेट एकेडेमीलाई दिएको छ । र, उक्त एकेडेमीले रुपन्देही क्रिकेट संघबाट स्वीकृत नलिई खेलाडीहरु छनोट गरेको छ ।’
रुपन्देही क्रिकेट संघले सम्पूर्ण सरोकारवालाहरुमा उक्त छनोट प्रक्रियामा आफ्नो कुनै किसिमको संलग्नता नरहेको स्पष्ट पार्दै भ्रममा नपर्न अनुरोध गरेको हो । अध्यक्ष थापाले पत्रकारहरुसँग कुराकानी गर्दै संघसँग सरोकार नै नभएको विषयलाई अतिरञ्जित नगर्न आग्रह गरे । उनले संघले सबै खेलाडीलाई सम्मान गर्ने र योग्य खेलाडीहरुको बृत्तिविकास र प्रबद्र्धनमा सधैं साथसहयोग दिँदै आएको बताए ।