दाङ, ५ भदौ। लुम्बिनी प्रदेशमा यस वर्षको मनसुन सुरु भएयता विपद्का घटनामा परी ८५ जनाको मृत्यु भएको छ। प्रदेश विपद् व्यवस्थापन परिषद्को बैठकमा प्रस्तुत विवरणअनुसार, जेठ १८ गतेदेखि भदौ ३ गतेसम्म प्रदेशभर ९१ वटा मनसुनजन्य विपद्का घटना भएका छन्।
विपद्का घटनामा ८५ जनाको मृत्यु हुनुका साथै १३ जना घाइते भएका छन् भने दुई जना अझै बेपत्ता छन्। सबैभन्दा धेरै मृत्यु पानीमा डुबेर भएको छ। पानीमा डुबेर मात्रै ५८ जनाले ज्यान गुमाएका छन्।
त्यस्तै, पहिरोमा २० जना, चट्याङमा तीन जना र बाढीमा चार जनाको मृत्यु भएको प्रदेश सरकारले जनाएको छ। यस अवधिमा बाढीका चार, चट्याङका सात, पहिरोका १० तथा अत्यधिक वर्षाका कारण छ वटा घटना भएका छन्।
रोल्पामा मनसुनजन्य विपद्का कारण चार स्थानीय तहमा २० जनाको मृत्यु भएको छ। थवाङमा मात्रै १२ जनाले ज्यान गुमाएका छन्। त्यहाँ एक जना बेपत्ता र दुई जना घाइते भएका छन्। सुनछहरी गाउँपालिकामा छ जनाको मृत्यु भएको छ भने लुङ्ग्री र परिवर्तन गाउँपालिकामा एक–एक जनाको मृत्यु भएको तथ्यांकमा उल्लेख छ।
विपद्का कारण रोल्पाका ती चार स्थानीय तहमा ११ घरधुरी विस्थापित भएका छन्। त्यस्तै, ३१८ घरधुरी अझै जोखिममा रहेको प्रदेश सरकारको तथ्यांकले देखाएको छ।