भैरहवा, ९ भदौ। रुपन्देहीको बुटवल र पश्चिम नवलपरासीबाट भन्सार छलेर भित्राइएको विभिन्न सामग्री बरामद भएको छ ।
लुम्बिनी प्रदेश प्रहरी कार्यालय दाङ तथा मातहतका प्रहरी टोलीले विभिन्न स्थानमा गरेको चेकजाँचका क्रममा उक्त सामान बरामद गरेको हो।
लुम्बिनी प्रदेश प्रहरी कार्यालय दाङले सार्वजनिक गरेको विवरण अनुसार, बुटवल उपमहानगरपालिका–९, कालिकानगरस्थित एक घरमा लुकाएर राखिएको ९ लाख ६२ हजार मूल्य बराबरको ४८१ थान कुर्ता सुरुवाल बरामद भएको छ।
त्यस्तै नवलपरासीको बर्दघाट नगरपालिका–१५ केराबारीबाट भन्सार छलेर बा.प्र.०६–००१ च ०७७३ नम्बरको पिकअपमा ल्याईँदै गरेको अवस्थामा ७ लाख १४ हजार बढी मूल्य बराबरको चकलेट बरामद भएको प्रहरीले जनाएको छ । ढुवानीमा प्रयोग भएको गाडी र चालक चितवन कालिका नगरपालिका–५ का २५ वर्षीय विजय बि.क.लाई नियन्त्रणमा लिइएको छ ।
बरामद सामान, पिकअप तथा नियन्त्रणमा लिइएको चालकलाई आवश्यक कानुनी कारबाही र अनुसन्धानका लागि सम्बन्धित प्रहरी कार्यालयमा बुझाइएको लुम्बिनी प्रदेश प्रहरी कार्यालय दाङले जनाएको छ।