भैरहवा, २२ असोज । रुपन्देही र पश्चिम नवलपरासीका नाकाबाट भइरहेको तस्करी नियन्त्रणका लागि लुम्बिनी प्रदेशका डिआइजी भूपेन्द्र बहादुर खत्रीको टोली सक्रिय देखिएको छ। दैनिक जसो उक्त टोलीले तस्करीका सामग्री बरामद गर्दै आएको छ।
दाङबाट खटिएको उक्त विशेष प्रहरी टोलीले रुपन्देही र नवलपरासी पश्चिमका विभिन्न स्थानबाट दुई दिनमा करिब १८ लाख बढी मूल्य बराबरको लत्ताकपडा, जुत्ता लगायतसामग्री बरामद गरेको छ। साथै, तस्करीका सामग्री ओसारपसारको आरोपमा गाडी र चालकलाई समेत नियन्त्रणमा लिइएको लुम्बिनी प्रदेश प्रहरी कार्यालय दाङले जनाएको छ।
Advertisement
Advertisement
Advertisement
कार्यालयले सार्वजनिक गरेको विवरण अनुसार, नवलपरासी पश्चिमको सुस्ता–१ बाट मात्रै ११ लाख ६८ हजार ७०० रुपैयाँ बराबरका साडी, कुर्था सुरुवाल, टिसर्ट, सेरवानी, लुङ्गी कपडा बरामद भएको छ।
यस्तै रुपन्देहीको देवदह नगरपालिका-१२ सुक्रौलीबाट २ लाख ८५ हजार रुपैयाँका जुत्ता र प्रयोग भएको पिकअप गाडीसहित चालक राजेश यादवलाई नियन्त्रणमा लिइएको छ।
त्यस्तै, सिद्धार्थनगर नगरपालिका-१ (भैरहवा) बाट २ लाख ४४ हजार ६४० रुपैयाँ बराबरका कुर्ता-सुरुवाल, बटर बरामद गरेर सम्बन्धित प्रहरी कार्यालयमा बुझाइएको र घटनाबारे थप अनुसन्धान भइरहेको लुम्बिनी प्रदेश प्रहरी कार्यालय दाङले जनाएको छ।
