भैरहवा,२८ असोज। रुपन्देहीको भैरहवामा डान्डिया र भगवती रात्रि जागरण कार्यक्रम हुने भएको छ। श्री श्री सार्वजनिक दुर्गा पूजा समितिको आयोजनामा आगामी कार्तिक २ गते सोमबार डान्डिया कार्यक्रम तथा कार्तिक ३ गते मंगलबार भगवती रात्रि जागरण सञ्चालन गरिने भएको हो।
आयोजकका अनुसार कार्तिक ३ गते साँझ ७ बजेदेखि राति १ बजेसम्म भगवती रात्रि जागरण सञ्चालन हुनेछ। कार्यक्रममा भारतका विभिन्न कलाकारहरुको समेत प्रस्तुति रहनेछ।
Advertisement
Advertisement
Advertisement
नेपाली समाजको मौलिक संस्कृति र परम्पराको संरक्षण गर्नुका साथै माता दुर्गाप्रतिको श्रद्धा र भक्तिभाव अभिव्यक्त गर्नु कार्यक्रमको मुख्य उद्देश्य रहेको समितिका अध्यक्ष रवि जयसवालले बताए। धार्मिक आस्था र सांस्कृतिक उत्सवलाई एकै ठाउँमा जोडेर समाजमा आपसी सद्भाव, एकता र भाइचाराको भावना अभिवृद्धि गर्नु पनि कार्यक्रमको उद्देश्य रहेको उनले जनाए।
बुधबार भैरहवामा आयोजित पत्रकार सम्मेलनमा आयोजकले उक्त कार्यक्रम भैरहवाको पुरानो सांस्कृतिक इतिहाससँग जोडिएको र विगत २५ वर्षदेखि निरन्तर आयोजना हुँदै आएको जानकारी दिएका छन्। मिलनचोक र गल्लामण्डी क्षेत्रबाट सुरु भएको यो परम्परा अहिले रुपन्देहीका विभिन्न स्थानमा सांस्कृतिक उत्सवका रुपमा विस्तार हुँदै गएको समितिका सचिव विशाल श्रीवास्तवले बताए।
कार्यक्रम संयोजक दिपेश गुप्ताले डाँडिया तथा भगवती रात्रि जागरणले महिला र युवाहरुलाई आफ्नो प्रतिभा प्रस्तुत गर्ने अवसर प्रदान गर्ने बताए। विभिन्न समुदायका व्यक्तिहरुलाई एउटै मञ्चमा जोड्दै आपसी सम्बन्ध सुदृढ बनाउन र मनोरञ्जनका माध्यमबाट सांस्कृतिक एकता कायम गर्न कार्यक्रमले महत्त्वपूर्ण योगदान पुर्याउने अपेक्षा गरिएको उनले उल्लेख गरे।
