भैरहवा, २० माघ । सिद्धार्थनगर नगरपालिका वडा नम्बर २ कार्यालय, रुपन्देहीको आयोजनामा शनिबार भैरहवामा भएको प्रथम वडा कप टेनिसबल क्रिकेट प्रतियोगिता–२०८० को उपाधि मेउडिहवा सुपर किंग्सले जितेको छ ।
सिद्धार्थनगर–३ स्थित सिद्धार्थ क्रिकेट रंगशालामा भएको प्रतियोगिता अन्तर्गत फाइनल खेलमा झण्डीबजार सुपर किंग्सलाई ६ रनले पराजित गर्दै मेउडिहवा सुपर किंग्सले उपाधि जितेको हो ।
Advertisement
Advertisement
Advertisement
विजेता मेउडिहवा सुपर किंग्स टीमले नगद रु. ११ हजारसहित ट्रफी तथा उपविजेता झण्डीबजार सुपर किंग्सले नगद रु. ८ हजारसहित ट्रफी पाएको सिद्धार्थनगर–२ का वडाअध्यक्ष छेदीलाल श्रीवास्तवले बताए । उनले प्रथम वडा कप क्रिकेट प्रतियोगितामा खेलाडीहरुको उत्साहजनक सहभागीता रहेको बताए ।
फाइनल खेलमा टस जितेर ब्याटिङ रोजेको मेउडिहवा सुपर किंग्सले निर्धारित १२ ओभरमा ८ विकेट गुमाउँदै १०७ रन बनायो । उसका लागि खेमराज गुरुङले ५३ र उमेश कोहारले १३ रनको योगदान गरे ।बलिङमा झण्डीबजारका राहुल थापा र समित बासफोरले समान २/२ विकेट लिए ।
जवाफमा झण्डीबजार सुपर किंग्सले १२ ओभरमा ६ विकेटको क्षतिमा १०१ रन बनायो । उसका लागि राहुल थापाले ५७ रनको योगदान गरे ।
बलिङमा मेउडिहवा सुपर किंग्सका शिवशंकर गुप्ताले २, विजय धरिकार, अजय प्रजापति, विजय प्रजापति र अनिल कुमार यादवले समान १/१ विकेट दिए । प्रतियोगिता अन्तर्गत फाइनल खेलको म्यान अफ द म्याच मेउडिहवा सुपर किंग्सका खेमराज गुरुङ म्यान अफ द म्याच घोषित भए ।
त्यस्तै रोयल मेउडिहवाका बेष्ट ब्याटर सन्देश शाक्य, बेष्ट बलर तथा उत्कृष्ट खेलाडी सोही टीमका विजय धरिकार र बेष्ट किपर झण्डीबजार सुपर किंग्सका अभय थापा घोषित भए ।
प्रतियोगिताको विजेता, उपविजेता, म्यान अफ द म्याच, बेष्ट बलर, उत्कृष्ट खेलाडी तथा बेष्ट किपरलाई सिद्धार्थनगर नगरपालिकाका प्रमुख प्रशासकीय अधिकृत नवराज पौड्याल, सिद्धार्थनगर–२ का वडाअध्यक्ष छेदीलाल श्रीवास्तव, ३ का अध्यक्ष नारायण प्रसाद उपाध्याय, ७ का अध्यक्ष दामोदर शर्मा घिमिरे, १ का अध्यक्ष उज्जवल पोखरेल, ४ का अध्यक्ष मुक्तिनाथ यादव (भोला) लगायतले पुरस्कार वितरण गरेका थिए । कार्यक्रममा प्रतियोगितामा सहभागी सम्पूर्ण टीमका खेलाडीहरुलाई प्रमाणपत्र प्रदान गरिएको थियो ।
सो अवसरमा बोल्दै प्रमुख प्रशासकीय अधिकृत पौड्यालले प्रतियोगितामा खेलाडीहरुको क्रिकेटप्रति निकै नै राम्रो लगाव रहेको आफूले पाएको बताए । उनले सिद्धार्थनगरले धेरै क्रिकेट खेलाडीहरु पाएको बताए ।
त्यस्तै सिद्धार्थनगर–७ का वडाअध्यक्ष दामोदर शर्मा घिमिरेले सिद्धार्थनगरमा वडाहरुले खेलकुदलाई महत्व दिएको बताए ।
प्रतियोगितामा झण्डीबजार सुपर किंग्स, रोयल मेउडिहवा चोक, रोयल फूलपुर र मेउडिहवा सुपर किंग्स गरी ४ वटा टीमको सहभागीता रहेको प्रतियोगिताका संयोजक तथा सिद्धार्थनगर–२ का वडा सदस्य राजकुमार यादवले बताए । प्रतियोगिता अन्तर्गत तीनवटा खेल भएका थिए ।
यसअघि प्रतियोगिताको उद्घाटन गर्दै सिद्धार्थनगर नगरपालिकाका प्रमुख इश्तियाक अहमद खानले वडा कार्यालयले खेलकुदको विकासका लागि क्रिकेट प्रतियोगिता आयोजना गर्दै आएको बताए । उनले सरकारले खेलकुदको विकासमा ध्यान दिएको बताए । उनले क्रिकेटको माध्यमबाट खेलाडीलाई विश्वमै चिनाउन सफल भएको बताए ।
नगर उपप्रमुख उमा अधिकारीले यस्ता प्रतियोगिताले खेलाडी उत्पादनमा सहयोग पुर्याउने बताइन् । सिद्धार्थनगर–१ का वडाअध्यक्ष उज्जवल पोखरेलले वडा कपले विभिन्न टोलका खेलाडीबीच सम्बन्ध मजुबत बनाउने बताए ।
सिद्धार्थनगर नगरपालिका–२ का वडा सदस्य दिपेश प्रताप शाहीको स्वागत तथा सिद्धार्थनगर–४ का वडाअध्यक्ष मुक्तिनाथ यादव (भोला) र सिद्धार्थनगर–२ का युवा श्याम कोहारको सञ्चालनमा कार्यक्रम सम्पन्न भएको थियो ।
