भैरहवा, २७ फागुन। जवानीमा अपराध गरेर फरार रहेका दुई जना प्रतिवादीलाई प्रहरीले ३७ वर्षपछि पक्राउ गरेको छ। जघन्य अपराध हत्या गरेर फरार भएका पर्वत जिल्ला महाशिला गाउँपालिका–५ का ५७ वर्षीय गम्भिर गुरुङ र सोही स्थानका ५५ वर्षीय तेज बहादुर गुरुङलाई ३७ वर्षपछि पक्राउ गरिएको जिल्ला प्रहरी कार्यालय पर्वतले जनाएको छ।
पक्राउ परेका गम्भिर गुरुङ वर्षौ देखि रुपन्देहीको मायादेवी गाउँपालिका–८ बसडिलवास्थित फ्यूचर लाइट ईङलिस बोर्डिङ स्कूल संचालन गरेर बसेका थिए। उनी विद्यालयका प्रधानाध्यापक (प्रिन्सिपल) समेत हुन्। पर्वतबाट आएको प्रहरी टोलीले उनलाई पक्राउ गरेको हो।
मुद्दाका फरार प्रतिवादी गम्भिर गुरुङलाई मायादेवी गाउँपालिका–८ बसडिलवाबाट र तेज बहादुर गुरुङलाई ललितपुरको महालक्ष्मी नगरपालिका–८ लुभुबाट पक्राउ गरिएको जिल्ला प्रहरी कार्यालय पर्वतका प्रमुख प्रहरी नायब उपरीक्षक (डीएसपी) रविन विष्टले बताए ।
उनका अनुसार चुनावसँग सम्बन्धित झैझगडामा गम्भिर गुरुङ र तेज बहादुर गुरुङ समेतले ०४४ साल फागुन ७ गते योजना बनाएर लाठी तथा चक्कुले रामबहादुर गुरुङको हत्या गरी खोल्सामा फालेर फरार भएका थिए। त्यसपछि प्रहरीले कर्तव्य ज्यान मुद्दामा अनुसन्धान गरेर पक्राउ परेका दुई जनासमेतलाई प्रतिवादी बनाउँदै जिल्ला सरकारी वकिल मार्फत जिल्ला अदालत पर्वतमा मुद्दा दायर गरेको थियो।
जिल्ला अदालत पर्वतले ०५८ साल असार १३ गते मुद्दाका सबै प्रतिवादीलाई जनही दश वर्षको कैद सजाएको फैसला गरेको जिल्ला प्रहरी कार्यालय पर्वतले जारी गरेको प्रेस विज्ञप्तिमा उल्लेख छ।
पक्राउ परेका दुवै जनालाई फैसला कार्यान्वयनका लागि अदालतमा उपस्थित गराएर कैद सजाए भुक्तानका लागि जिल्ला कारागार पठाइएको जिल्ला प्रहरी कार्यालय पर्वतले जनाएको छ ।
पर्वत प्रहरीले अदालतबाट दोषी ठहर भएर कैद वा जरिवाना वा दुवै सजाएको फैसला पश्चात सजाए भुक्तान नगरेका फरार प्रतिवादीलाई पछिल्लो समययता धमाधम पक्राउ गरिरहेको छ।
‘फौजदारी अपराधको कसुर ठहर भएर सजाए पाएका व्यक्तिहरु समाजमा घुमिराख्नु शान्ति सुरक्षामा चुनौतीको विषय हो’,जिल्ला प्रहरी कार्यालय पर्वतका प्रमुख डीएसपी विष्टले भने ‘जसप्रति अभियान नै चलाएर हामी निर्मम रुपमा उत्रिएका छौँ।’ प्रहरीले अदालतबाट फैसला भएका फौजदारी र देवानी दुवै प्रकृतिको मुद्दामा फरार प्रतिवादीहरुलाई पक्राउ गरिरहेको छ।
दशकौँ अघिदेखि फरार प्रतिवादीको हुलिया, व्यक्तिगत पहिचान, पेशा, ठेगाना लगायत परिवर्तन गरेर बस्ने गरेकोले उनीहरुलाई पक्राउ गर्नमा चुनौती रहेपनि जिल्लासँगै विभिन्न प्रहरी युनिटबाट खटिएर कार्यसम्पादन भइरहेको उनी बताउँछन्।
कानुनी राज्य र विधिको शासन प्रत्याभूति गराउने उद्देश्यले चलाइएको अभियान अन्र्तगत धमाधम फरार प्रतिवादीहरुलाई पक्राउ गरेर सजाए भुक्तानका लागि अदालतमा पेश गर्ने कार्य भइरहेको उनले जनाए।