भैरहवा,४ चैत। नेपाल प्रहरीका प्रहरी महानिरीक्षक (आईजीपी) बसन्तबहादुर कुँवर सोमबार (आज) राति १२ बजेबाट ३० वर्षे सेवा अवधिका कारण अनिवार्य अवकाशमा जाँदैछन्। अवकाशमा जाने लागेका कुँवरलाई सशस्त्र प्रहरी बल, नेपालले आइतबार विदाई गरिसकेको छ भने नेपाल प्रहरीको मुख्यालयमा पनि बिदाईको तयारी छ ।
कुँवरको अवकाशसँगै नेपाल प्रहरीले नयाँ कमाण्डर पाउनेछ । जसका लागि आज बस्ने मन्त्रिपरिषद्को बैठकले करिब ८० हजार जनशक्ति रहेको नेपाल प्रहरीको कमाण्डर तोक्ने (निर्णय) छ । संगठनको ३१ औं आईजीपीका लागि तीन जना एआईजी दीपक थापा, सुदिप गिरी र टेक बहादुर तामाङबीच प्रतिस्पर्धा छ।
Advertisement
Advertisement
Advertisement
यी तीनजना एआईजी मध्ये सरकारले जसलाई पनि प्रहरी प्रमुखको रुपमा नियुक्त गर्न सक्नेछ। ‘एआईजीहरुमध्येबाट र एआईजी नभएको अवस्थामा डीआईजीमध्येबाट ज्येष्ठता, कार्यकुशलता, कार्यक्षमता, उत्तरदायित्व बहन गर्नसक्ने क्षमता, नेतृत्व प्रदान गर्न सक्ने कुशलता तथा आफूभन्दा मुनिको प्रहरीलाई प्रोत्साहन र परिचालन गर्न सक्ने सामर्थ्यको आधारमा नेपाल सरकारले उपयुक्त देखेको उम्मेदवारलाई आईजीपी पदमा बढुवा गर्नसक्ने छ,’ प्रहरी नियमावलीको दफा ४१ मा उल्लेख छ।
विद्यमान नियमावली रहेको अवस्थामा यी तीन जनामध्ये हुने आईजीपी आगामी २०८२ साल भदौसम्म मात्रै सेवा रहेछन्। त्यसपछि ३० वर्षे सेवा अवधिकै कारण उक्त आईजीपी पनि अवकाशमा जानेछन्।
आईजीमा बढुवा भएसँगै एआईजी र डीआईजी बढुवाको बाटो खुल्छ । आईजीपी कुवँरसँगै एआईजीहरु बुद्धिराज गुरुङ, कुबेर कडायत, दुर्गा सिंह, जनक भट्टराई,टेकप्रसाद राई पनि अनिवार्य अवकाशमा जाँदैछन्। आईजीपीमा हालको एक जना एआईजी नियुक्त भएपश्चात एआईजीको ६ पद रिक्त हुनेछ । सोही ६ एआईजी पदमा बढुवाका लागि डीआईजीहरु पनि दौडधुपमा लागेका छन् ।
एआईजीसँगै प्रहरी नायब महानिरीक्षक (डीआईजी) गणेश चन्द, भोला रावल र ध्रुवराज राउत पनि सोमबार (आज) राति १२ बजेबाट अनिवार्य अवकाशमा जाँदैछन् ।
