बुटवल, ७ चैत। रुपन्देहीको बुटवलस्थित लुम्बिनी प्रादेशिक अस्पताल पहिलोपटक गरिएको एन्जियोप्लाष्टी उपचार सफल भएको छ। वरिष्ठ कार्डियोलोजिष्ट डा. रोशन घिमिरेको नेतृत्वमा ७५ वर्षीय एक पुरुषको एन्जियोप्लाष्टी उपचार गरिएको हो।
एन्जियोप्लाष्टी एक गैर–सर्जिकल प्रक्रिया हो। जसले हृदयमा रगत आपूर्ती गर्ने नशाहरुमा अवरोध हटाउन मद्दत गर्दछ । यस प्रक्रियामा स्थानीय एनेस्थेसिया प्रयोग गरिन्छ।
Advertisement
Advertisement
Advertisement
पहिलोपटक बिरामीको एन्जियोप्लाष्टी सफल भएकोमा खुसी व्यक्त गर्दै डा. घिमिरेले मुटुरोग उपचारमा थप नयाँ उपलब्धी प्राप्त भएको बताए। उनले मुटुरोग उपचारका लागि सेवाग्राहीलाई बुटवलबाहिर जानुपर्ने बाध्यता अन्त्य गर्न अन्य सेवाहरु समेत थप गर्न आवश्यक रहेपनि अहिले सुरु गरिएको एन्जियोप्लाष्टी सेवा यस क्षेत्रका जनताका लागि ठूलो खुसीको विषय भएको उल्लेख गरे।
विशेषज्ञ सेवालाई विस्तार गर्दै गएको लुम्बिनी अस्पतालमा मुटुरोग उपचारका लागि अन्यत्र जान नपर्ने गरी विभिन्न सेवाहरु थप गर्ने योजना रहेको अस्पतालका मेडिकल सुपरीटेण्डेण्ट डा. इन्द्र ढकालले जनाए । अस्पतालमा क्याथ ल्याब सेवा अन्तरगत एक जनाको स्थायी पेसमेकर राख्नुका साथै ३ जनालाई अस्थायी पेसमेकर राख्ने काम समेत सफल भएको अस्पताल प्रशासनले जनाएको छ। क्याथ ल्याब सेवा सुरु भएपछि हालसम्म ८० जनाको एन्जियोग्राफी गरिएको तथ्यांकमा उल्लेख छ ।
अस्पतालमा पछिल्लो समय ट्रेड मिल टेस्ट (टीएमटी) सेवा समेत सञ्चालन गरिएको छ। यसबाट मुटुका नशाहरुमा ब्लकेजहरु भए/नभएको थाहा पाउन सकिने र सोहीअनुसार उपचार गर्न सजिलो हुनेछ। अस्पतालमा पेरिकार्डियो सेन्टेसिस, होल्टर इसिजी लगायतका सेवा समेत सञ्चालनमा आएका छन्।