आयोगमा रमेश लेखकको जवाफ– बल प्रयोगका लागि आदेश दिएको थिएन (पूर्णपाठ)

काठमाडौं, १४ पुस । पूर्वगृहमन्त्री रमेश लेखकले भदौ २३ र २४ गतेको घटना सम्बन्धमा गठित जाँचबुझ आयोग समक्ष लिखित धारणा पेश गरेका छन्। उनले आयोगमा पदाधिकारीहरुले सोधेको प्रश्नको बयानमार्फत जवाफ दिनुका साथै लिखित रुपमा तयार पारेको जवाफ पनि पेस गरेका छन् ।

सोमबार आयोगमा उपस्थित भएका लेखकले प्रदर्शनका क्रममा बल प्रयोग गर्न कुनै लिखित वा मौखिक आदेश नदिएको स्पष्ट पारेका छन्। आयोगलाई बुझाएको ६ पृष्ठ लामो लिखित जवाफमा उनले भदौ २२ गतेको केन्द्रीय सुरक्षा समितिको बैठकमा ‘कुनै हताहती नहोस् र संयमता अपनाउनू’ भनी निर्देशन दिएको उल्लेख गरेका छन्।

पूर्वमन्त्री लेखकले जेनजी समूहको शान्तिपूर्ण प्रदर्शनलाई लोकतन्त्र विरोधी तत्त्वले हिंसात्मक बनाइएको दाबी गरेका छन्। उनले संसद् भवन, सर्वोच्च अदालत र आफ्नो निजी निवासमा भएको आगजनीलाई ‘सुनियोजित षड्यन्त्र’ र ‘लोकतन्त्रमाथिको आक्रमण’ भएको भनेका छन्।

घटनामा युवाहरुको ज्यान गएकोमा आफू मर्माहत भएको, आगजनीमा आफ्ना ऐतिहासिक दस्तावेज नष्ट भएको, र बिरामी आमालाई अक्सिजनबिना अस्पताल लैजाँदा मृत्यु भएको दुखद प्रसङ्ग पनि उनले बयानमा उल्लेख गरेका छन्।

उनले आयोगको सिफारिसमा सरकारले बिना जानकारी तीन महिनादेखि राहदानी रोक्का गरेको र काठमाडौँ उपत्यका बाहिर जान प्रतिबन्ध लगाएकोमा आपत्ति जनाएका छन्। उनले आफूलाई सफाइको अवसर नदिई गरिएको निर्णयलाई विधिको शासन र सुनुवाइको सिद्धान्त विपरीत ठहराएका छन्।