बंगलादेश,१ फागुन । बंगलादेशमा सम्पन्न निर्वाचनमा बंगलादेश राष्ट्रवादी पार्टी (बीएनपी) ले बहुमत हासिल गरेसँगै त्यहाँ करिब ३५ वर्षपछि पुरुष प्रधानमन्त्री हुने भएका छन् । निर्वाचनबाट पार्टी अध्यक्ष तारिक रहमान प्रधानमन्त्री बन्ने लगभग निश्चित छ।
कुल ३०० सिटमध्ये २९९ सिटमा भएको मतदानमा पार्टीले २०९ सिट जितेको अन्तराष्ट्रिय सञ्चारमाध्यमले जनाएको छ। शेरपुर–३ क्षेत्रमा एक उम्मेदवारको मृत्यु भएपछि त्यहाँको निर्वाचन स्थगित गरिएको थियो। १७ वर्ष लामो लन्डन निर्वासनपछि पूर्व प्रधानमन्त्री खालिदा जियाका छोरा सक्रिय राजनीतिमा फर्किएका तारिक रहमानले यस निर्वाचनमा पार्टीको नेतृत्व गरेका थिए। उनैलाई अब नयाँ प्रधानमन्त्रीका रूपमा हेरिएको छ।
Advertisement
Advertisement
Advertisement
शेख हसिनाको पार्टी अवामी लिग निर्वाचनमा सहभागी नभएका कारण बीएनपीलाई यसको प्रत्यक्ष फाइदा पुगेको बीबीसी हिन्दीमा उल्लेख छ।
सुरुमा बंगलादेशमा काजी जफर अहमद १९८८ मा प्रधानमन्त्री बनेका थिए। त्यसपछि १९९१ देखि २०२४ सम्म शेख हसिना र खालिदा जिया आलोपालो प्रधानमन्त्री भइरहेका थिए। सन् २०२४ मा भएको विद्यार्थी आन्दोलनका कारण तत्कालीन प्रधानमन्त्री शेख हसिनाको निर्वासन र पूर्वप्रधानमन्त्री खालिदा जियाको निधनपछि बंगलादेशमा नोबेल शान्ति पुरस्कार विजेता मुहम्मद युनुसको नेतृत्वमा गठन गरिएको अन्तरिम सरकारले बिहीबार संसदीय चुनाव गराएको हो।
यस सँगै विद्यार्थी आन्दोलनबाट जन्मिएको पार्टी राष्ट्रिय नागरिक पार्टी (एनसिपी) ले ६ सिटमा मात्रै विजयी भएको छ। एनसिपी नेता नाहिद इस्लामले ढाका-११ मा अग्रता लिइरहेका छन्। अन्य स्थानमा केही नेताहरुको मात्रै जित पक्का भएको भनिएको छ। एनसिपी नेता नाहिद इस्लामले मतदानअघि एनसिपीसहितको गठबन्धनले सरकार बनाउने दाबी गरेका थिए। तर परिणाम भने उनको पक्षमा नआउने देखिएको छ। बंगलादेशमा ३०० सदस्यीय प्रतिनिधि सभामा बहुमतका लागि १५१ सिट आवश्यक रहन्छ।
