अमेरिका,९ फागुन । अमेरिकी राष्ट्रपति डोनाल्ड ट्रम्पले विश्वका सबै देशहरुबाट मुलुकमा आयात हुने सामग्रीहरुमा १० प्रतिशत भन्सार महसुल (ट्यारिफ) लगाएका छन्। जसका लागि उनले कार्यकारी आदेशमा हस्ताक्षर गरेका छन् ।
ट्रम्पले सामाजिक सञ्जालमा आफ्नो पोस्टमार्फत सबै देशहरुलाई ट्यारिफ लगाइएको जानकारी दिएका छन् । यो तत्काल लागू हुने उनले बताएका छन् ।
Advertisement
Advertisement
Advertisement
शुक्रबार नै ट्रम्पले राष्ट्रिय आपतकालीन अवस्थामा प्रयोग हुने कानूनअन्तर्गत लगाइएका केही ट्यारिफहरुलाई सर्वोच्च अदालतले गैरकानुनी ठहर गरेको भन्दै ती स्थानमा १० प्रतिशत विश्वव्यापी ट्यारिफ लगाउने आदेशमा हस्ताक्षर गर्ने बताएका थिए । समाचार ब्रिफिङमा बोल्दै ट्रम्पले सर्वोच्च अदालतका न्यायाधीशहरुमाथि कडा टिप्पणी गरे ।
उनले अदालत विदेशी हितबाट प्रभावित भएको आरोप लगाउँदै सर्वोच्च अदालतको ट्यारिफसम्बन्धी फैसला अत्यन्त निराशाजनक रहेको बताए । अमेरिकी सर्वोच्च अदालतले शुक्रवार ट्रम्प प्रशासनले राष्ट्रिय आपतकालीन अवस्थाका लागि प्रयोग हुने अन्तर्राष्ट्रिय आपतकालीन आर्थिक शक्ति ऐनअन्तर्गत लगाएका व्यापक ट्यारिफहरुलाई गैरकानूनी ठहर गरेको थियो ।
यो नयाँ १० प्रतिशत ट्यारिफ फेब्रुअरी २४ देखि लागू हुने र यो अस्थायी (१५० दिनसम्म) हुने बताइएको छ। केही वस्तुहरु (जस्तै ऊर्जा, औषधि, अटोमोबाइल, एरोस्पेस) र (अमेरिका–मेक्सिको–क्यानडा सम्झौता) अन्तर्गतका सामानहरुमा छुट रहने जनाइएको छ। यो ट्यारिफ १९७४ को व्यापार ऐनको सेक्सन १२२ अन्तर्गत लगाइएको हो। यो घटनाले विश्व व्यापारमा नयाँ अनिश्चितता थपेको छ भने अमेरिकी अर्थतन्त्र र उपभोक्तामा प्रभाव पार्न सक्ने बताइएको छ।