भैरहवा, ११ भदौ। रुपन्देहीको जनउत्थान बचत तथा ऋण सहकारी संस्था लिमिटेडले रसुवाको भोटेकोशी नदीमा आएको बाढीबाट प्रभावित परिवारका लागि ८ लाख रुपैयाँ आर्थिक सहयोग गर्ने निर्णय गरेको छ।
संस्थाको सञ्चालक समितिको आकस्मिक बैठकले प्राकृतिक प्रकोपबाट प्रभावित परिवारको राहत तथा पुनःस्थापनाका लागि विभिन्न स्रोतबाट रकम संकलन गरी सहयोग गर्ने निर्णय गरेको संस्थाका अध्यक्ष गिरीप्रसाद पुनले जानकारी दिए। उक्त सहयोग रकम नेपाल बचत तथा ऋण केन्द्रीय सहकारी संघ (नेफ्स्कून) मार्फत उपलब्ध गराइने बताइएको छ।
उनका अनुसार, संस्थाको साधारण सभाले विपद्को समयमा सहयोग गर्न सदस्यको खाताबाट रकम झिकेर सहयोग गर्न सक्ने अख्तियारी सञ्चालक समितिलाई दिएको थियो। सोही अख्तियारीअनुसार प्रत्येक सदस्यको खाताबाट १० रुपैयाँका दरले सहयोग गर्ने निर्णय गरिएको उनले बताए ।
सहयोग रकममध्ये ४५ हजार शेयर सदस्यबाट प्रतिव्यक्ति १० रुपैयाँका दरले ४ लाख ५० हजार रुपैयाँ, संस्थाका समिति तथा उपसमितिका पदाधिकारीबाट एक दिनको भत्ताबापतको रकम १ लाख रुपैयाँ, संस्थाको तर्फबाट १ लाख ५५ हजार रुपैयाँ र कर्मचारीबाट एक दिनको तलबबापतको रकम १ लाख रुपैयाँ रहने संस्थाका प्रमुख कार्यकारी अधिकृत रनबहादुर थापाले जानकारी दिए।
संस्थाले विपद्को कठिन अवस्थामा प्रभावित नागरिकलाई राहत उपलब्ध गराउने उद्देश्यले सामाजिक उत्तरदायित्वअन्तर्गत सहयोग घोषणा गरेको जनाएको छ।