काठमाडौं,१६ भदौ। पूर्वाधार विकासमन्त्री सुनिल लम्सालले कृष्णभीरमा तत्काल आवश्यक संरचना निर्माण गरी अवरुद्ध पृथ्वी राजमार्ग सञ्चालन गरिने बताएका छन्।
पृथ्वी राजमार्ग सञ्चालनका लागि तत्कालीन तथा दीर्घकालीन समाधानका विषयमा मंगलबार बसेको पूर्वाधार विकास मन्त्रालयको बैठकले कृष्णभीरको हिलसाइडमा ‘ग्याबियन ब्रेस्ट वाल’ माथिबाट सवारीसाधन सञ्चालन गर्न मिल्ने गरी आवश्यक संरचना निर्माणको काम तत्काल अगाडि बढाउने निर्णय गरेको मन्त्री लम्सालले बताए।
Advertisement
Advertisement
Advertisement
उनका अनुसार बैठकले विपद्को सामना गर्न तथा विपद् प्रभावित क्षेत्र र राजधानीसँगको आपूर्ति शृङ्खला पुनःस्थापना गर्न आवश्यक काम अघि बढाउने निर्णय गरेको छ। त्यसका लागि ट्र्याक खोल्ने कार्यसँगै ‘सेक्रिफिसियल ग्याबियन बक्स’ तथा ‘बोल्डर हिलसाइड’ बाट तल खसाल्ने कार्य गरिनेछ।
कृष्णभीरको दीर्घकालीन समाधानका लागि टनेल, सोइल नेलिङ, सिट पाइललगायतका विकल्पबारे सडक विभागले आवश्यक अध्ययन गर्ने निर्णयसमेत बैठकले गरेको छ।
यस्तै, कृष्णभीरको विकल्पका रुपमा टनेल वा बाइपास सडक निर्माणका सम्भावित विकल्पहरुको तत्काल अध्ययन गरी चालु आर्थिक वर्षको अन्त्यसम्म वैकल्पिक सडक व्यवस्था गर्ने निर्णय भएको मन्त्री लम्सालले जानकारी दिए।
विभिन्न विकल्पहरुको अध्ययनका लागि नेपाल जियोटेक्निकल सोसाइटीले आवश्यक विज्ञ सेवा उपलब्ध गराउने तथा आवश्यकताअनुसार सडक विभागसँग समझदारीपत्र (एमओयू) गर्ने निर्णयसमेत बैठकले गरेको छ।
