काठमाडौं, २४ भदौ। राष्ट्रिय स्वतन्त्र पार्टी (रास्वपा) का सभापति रवि लामिछानेले विपद्का कारण पीडामा रहेका नागरिकमाथि अमानवीय व्यवहार गर्नेलाई विज्ञप्तिमा मात्र सीमित नभई कानुनी कारबाही गर्न सरकारसँग आग्रह गरेका छन्।
बुधबार प्रतिनिधि सभा बैठकमा विशेष सम्बोधन गर्दै लामिछानेले पीडितको आक्रोशलाई लिएर सामाजिक सञ्जाल, सार्वजनिक स्थान वा अन्य माध्यमबाट होच्याउने तथा तुच्छ टिप्पणी गर्ने प्रवृत्ति स्वीकार्य नहुने बताए। उनले राज्य पीडितको पक्षमा रहेको अनुभूति नागरिकले व्यवहारमै गर्न सक्ने गरी सरकार प्रस्तुत हुनुपर्नेमा जोड दिए।
Advertisement
Advertisement
Advertisement
‘पीडामा रहेका नागरिकलाई कतैबाट अमानवीय दुर्व्यवहार हुन्छ भने त्यस्ता व्यक्तिमाथि हामी निर्मम हुन्छौँ भनेर विज्ञप्ति मात्रै निकाल्ने होइन, राज्य निर्मम र पीडितको पक्षमा उभिएको छ भन्ने कुरा नागरिकले महसुस गर्ने गरी देखाइदिनुहोला,’ उनले भने।
लामिछानेले रास्वपाका नेता–कार्यकर्तालाई समेत पीडितको अपमान हुने अभिव्यक्ति नदिन निर्देशन दिएका छन्। पार्टीमा आबद्ध व्यक्तिले सामाजिक सञ्जालमार्फत पीडितमाथि अमानवीय टिप्पणी गरेको पाइए साधारण सदस्यबाट समेत निष्कासन गरिने उनले चेतावनी दिए।
पीडितको सम्मान, संवेदना र न्यायका पक्षमा पार्टी स्पष्ट रुपमा उभिने बताउँदै लामिछानेले अमानवीय अभिव्यक्ति दिने कसैलाई पनि संरक्षण नगर्ने स्पष्ट पारे।
