काठमाडौं,१२ कात्तिक। नागढुङ्गा–नौबिसे सुरुङमार्ग प्रयोग गर्ने सवारीसाधनबाट आगामी कात्तिक १५ गतेदेखि टोल शुल्क उठाइने भएको छ। नागढुङ्गा सुरुङमार्ग निर्माण आयोजनाले बिहीबार सूचना जारी गर्दै सडक बोर्ड नेपालको कार्यकारी समितिको गत असोज १२ गतेको निर्णयअनुसार शुल्क संकलन सुरु गर्न लागिएको जनाएको हो।
सरकारले गत चैत २६ गते राजपत्रमा सूचना प्रकाशित गरी सुरुङमार्ग प्रयोग गर्ने विभिन्न प्रकारका सवारीसाधनका लागि शुल्क निर्धारण गरेको थियो। सवारीसाधनको वर्ग र काठमाडौं प्रवेश गर्ने वा बाहिरिने दिशाका आधारमा फरक–फरक दस्तुर निर्धारण गरेको छ।
Advertisement
Advertisement
Advertisement
निर्धारित दरअनुसार कार, भ्यान, पिकअप, ट्र्याक्टर, माइक्रोबस तथा अन्य हलुका सवारीसाधनका लागि काठमाडौं प्रवेश गर्दा ६५ रुपैयाँ र काठमाडौं बाहिरिँदा ६० रुपैयाँ तिर्नुपर्नेछ।
त्यसैगरी, मिनीबस तथा मिनी टिपर/ट्रकका लागि काठमाडौं प्रवेश गर्दा १२५ रुपैयाँ र बाहिरिँदा ८० रुपैयाँ शुल्क निर्धारण गरिएको छ। बस तथा सिंगल रियर एक्सल भएका ट्रकले काठमाडौं प्रवेश गर्दा २६० रुपैयाँ र बाहिरिँदा २०० रुपैयाँ दस्तुर तोकिएको छ।
मल्टिएक्सल ट्रक तथा भारी उपकरणका हकमा काठमाडौं प्रवेश गर्दा ६०० रुपैयाँ र काठमाडौं बाहिरिँदा २५० रुपैयाँ टोल शुल्क लाग्नेछ।
नागढुङ्गा–नौबिसे सुरुङमार्ग गत साउन ११ गते उद्घाटन गरिएको थियो। टोल शुल्क लागू भएपछि सुरुङमार्ग प्रयोग गर्ने सवारीसाधनले तोकिएको दरअनुसार शुल्क बुझाउनुपर्नेछ।
