भैरहवा, १६ भदौ। भोटेकोशी नदीमा आएको विनाशकारी बाढीबाट प्रभावित नागरिकको उद्धार, राहत तथा पुनःस्थापनाका लागि रुपन्देहीस्थित अर्घाखाँची सिमेन्ट लिमिटेडमा कार्यरत मजदुर तथा कर्मचारीले ६ लाख ७५ हजार रुपैयाँ सहयोग गरेका छन्।
उद्योगमा कार्यरत मजदुर तथा कर्मचारीले स्वतःस्फूर्त रुपमा आफ्नो पारिश्रमिकबाट रकम कटाएर उक्त रकम संकलन गरेका हुन्। संकलित रकम प्रधानमन्त्री दैवी प्रकोप उद्धार कोषमा जम्मा गरिएको छ।
Advertisement
Advertisement
Advertisement
विपद्को समयमा पीडित नागरिकलाई आफ्नो तर्फबाट थोरै भए पनि सहयोग गर्नुपर्छ भन्ने भावनाका साथ रकम संकलन गरिएको उनीहरुले बताएका छन्।
बाढी प्रभावितका लागि अर्घाखाँची सिमेन्टले दियो १ करोड ११ लाख
उद्योगका महाप्रबन्धक उद्धवबहादुर कार्कीका अनुसार उद्योगका तर्फबाट यसअघि नै १ करोड ११ लाख रुपैयाँ सहयोग गरिएको छ। त्यसबाहेक उद्योगमा कार्यरत मजदुर तथा कर्मचारीले व्यक्तिगत रुपमा रकम संकलन गरी बाढी प्रभावितका लागि सहयोग गरेका हुन्।
रुपन्देहीको सियारी गाउँपालिकामा रहेको अर्घाखाँची सिमेन्टमा नेपाली तथा भारतीय नागरिक गरी मजदुर र कर्मचारीसहित २ सय ९५ जना कार्यरत छन्।
विपद्का समयमा उद्योग तथा व्यावसायिक प्रतिष्ठानमा कार्यरत मजदुर तथा कर्मचारीले पनि आफ्नो क्षमताअनुसार सहयोग गर्नुपर्छ भन्ने सन्देश दिन रकम संकलन गरिएको महाप्रबन्धक कार्कीले बताए।
बाढीबाट प्रभावित नागरिकको उद्धार, राहत तथा पुनःस्थापनाका लागि राज्यसँगै निजी क्षेत्र, उद्योग–प्रतिष्ठान तथा त्यहाँ कार्यरत मजदुर–कर्मचारीको समेत योगदान आवश्यक रहेको उद्योगका नायब महाप्रबन्धक कृष्णप्रसाद पाण्डेले बताए।
